| Bäbekhanada |
- Alo, alo, alo! Bäbekhanamy? - Hawa, bäbekhana. Näme gerekdi? - Ýazgül Durdyýewaň nämesi boldy? - Size gyz gerekmi? Ogul gerekmi?! -Dogurjamy diýsem, ilki bilen-ä. Şol geliniň özüniň saglygy gerek. Onsoňam parhy ýok - gyzmy ýa ogul – Öýmüzde şolaryň ikisem seýrek -Onda buşluk: gerçek ogluňyz boldy Agramam – üç kilo sekiz ýüz gram. -Her kilosy üçin bir çemen bogup, Häzir ganat kakyp ýanyňa barýan… - Alo, alo, alo! Bäbekhanamy? -Hawa, aýdyberiň! Nämejik gerek? -Aý, menä beýle bir nebisjeňem däl: Berseňiz, ýekeje bäbejik gerek. -Aýdyň bäbekleriň haýsysy gerek? -Gyzjagaz bolsa-ha… dilegim şoldy. Sebäbi ozalam sekiz oglum bar. - Onda buşluk, agam, Gyzyňyz boldy! - Alo, alo, alo! Bäbekhanamy? -Hawa, edil özi. Näme gerekdi? -Jeren Çaryýewaň ýagdaýy niçik? -Gyzjagaz gerekmi? Ogul gerekmi? -Wah, mümkin bolsa-ha… bäş ogul gerek! Aňyrdan jakgyldap güldi eneke: - Häp-häzir-ä üçem ogluňyz boldy. Yzyny hem görüberýäs ýene-de… Ýaş ata ullakan sebedin alyp, Öýünden ylgady bazara tarap. Satyjy soraýar: “Almamy, narmy, Erikmi, üýümmi – haýsysy gerek?” “Sorap durmaň! – diýip, ýylgyrýar ata- Şu satýan zatlaryň her haýsyndan çek. Onda-da ýöne bir çekip durma-da, Hersinden üç kilo-iň gowsundan çek!..” Bäbekhana gelip togtady ata. Ellerinde bolsa bir putlyk sebet -Size kim gerekdi? -Bize-hä, bajy, Üç ogul doguran bir gelin gerek. - Şu zatlaň hemmesi şonuň üçinmi? Ýaşajyk eneke näz edip oňa, Bir ajap ýylgyrdy. Ýaş ata diýdi: -Ýary Jerenime, Ýarysam –saňa. …Şeýdip oktýabryň ak säherinde Doguldy bäş çaga. Bäş gözel çaga. Olaryň bäşisem sanlyja ýyldan Bileje jompuldap giderler baga. Bileje giderler akja mekdebe Mekdebi bir günde ederler tamam. Onsoň WUZ-a baryp, ondanam çykyp, Zähmet gapysyndan bererler salam. …- Alo, alo, alo! Bäbekhanamy? -Hawa… Ogulmy, gyz – haýsysy gerek?.. Şu mukaddes sözler bäbekhanada Şu gün gaýtalandy onlarça gezek. …Kyrk sekizde arman bilen ýumulup, Arzuwa ýetmedik gözlere derek, Aşgabadym saňa ýene, ýene-de Ulalmak, dogurmak, köpelmek gerek.
|
(0 baha)
Synlar