Berilen Baha    (0 baha)

Näçe gezek okaldy? 409

Halanlaryň Sany 35

Özün egsig saýmaz bedewden,

Gymmat etseň at ýanynda bellidir!

Bedew diýgeç, hemme bedew deň bolmaz,

Çyn bedewler meýdanynda bellidir.

Oglanlykda, bilmez idiň, bet idiň,

Ýamanga hiç ýokmaz sözüň-öwudin.

Aryf  bolsaň, aslyn sorma ýigidiň —

Edebinde,  erkanynda   bellidir.

Bu jahandan doýmaz gözüň, sir olmaç

Her ýolbarsdan gaplaň bolmaz, şir  olmaz,

Ýigit diýgeç, hemme ýigit bir olmaz,

Goç ýigitler myhmanynda bellidir.

Döwlet gonsa goç ýigidiň başynda,

Hemaýatly  ili gerek daşynda,

Ýigit özün maglum eder işinde,

Gylyjynda, zybanynda bellidir.

Magtymguly, garyplaryň gözýaşy,

Daglary ýandyrar, erider daşy,

Pakyra jebr eden zalymyň işi,

Rozy agşar diwanynda bellidir.

Ýeri : klassiklerimiz, Magtymguly