Berilen Baha    (0 baha)

Näçe gezek okaldy? 1200

Halanlaryň Sany 57

Adam ogly, pelek seniň

Bir gün donuň biçer gider!

Saňa urar hanjaryny,

Jellat ganyň saçar gider!

Gezme dünýä meýil edip,

Bihuda ýerde seýl edip,

Öňki gonanlaryň ötüp,

Göz açynçaň geçer gider.

Ölseň, seni kimiň ýatlar,

Haýkyr galar bedew atlar,

Any münen goç ýigitler

Gara toprak guçar gider.

Dünýäniň soňy bibatdyr,

Binamazyň jaýy otdur,

Ölüm bir ajy şerbetdir,

Her kim andan içer gider.

Köňül aýdadyr: ölmeseň,

Lahatda tenha galmasaň,

Eýäňe dogry bolmasaň –

Içan senden gaçar gider.

Magtymguly, bu ne jaýdyr,

Ajap bir kerwensaraýdyr,

Dünýä bir loly heleýdir,

Bir gün seni guçar gider.

Ýeri : klassiklerimiz, Magtymguly