Berilen Baha    (0 baha)

Näçe gezek okaldy? 412

Halanlaryň Sany 43

Eý, ýaranlar, neýleýin men, köýen janym bar meniň,
Bazary weýran bolupdyr, uly dükanym bar meniň,
Dowzah odundan beter ataş suzanym bar meniň,
Yşka özün gurban kylan bir perwanym bar meniň,
Neýleýin men sepil gezip, Hindistanym bar meniň.

Gül ýüzüni ol kylsa piş, Aý-Gün ondan uýalyr,
Bag içine girse meger , şuglasyndan gül solur,
Nazar salsa gazap bilen, bu jahan weýran bolur,
Ölüler jana girip, betbagtlar ykbal olur,
Neýleýin ol arap zyban - asyl zybanym bar meniň.

Geldi ebir, kyldy söweş suýy-asman saýyda,
Behişt erem hasyl olmuş bu jahan saraýyda,
Seýil kylyp geler boldy remezanyň aýyda,
Dowzahlar behişt bolupdyr, toba eýläp jaýyda,
Bu zeminiň üzresinde lamekanym bar meniň.

Külli älem yşky birlen ot alyp, nara bişer,
Roýuna muştak bolupdyr, köwkepler ýerge düşer,
Serwiler gül bitirip, etrapyna gözel üýşer,
Jemal üzre hind hala haýrandyr haýrul-beşer,
Külli älem gözelinden zyýat jenanym bar meniň.

Bu kapas içre telmuryp, yşkyna perwana men,
Bilbil oldum, ýetmedim, ol gözel reýhana men ,
Ser salyban, kyldym nazar, bu yşky-pynhana men,
Yşky birlen hakister bolgan bu natuwana men,
Istemez men behişti, behişt mekanym bar meniň.

Görenleriň gözi doýmaz, görmegen arman çeker,
Roýuna maýyl bolup men, tütünim asman çykar,
Bagy içre bolsam hasyl, alnymdan reýhan çykar,
Syýa zülpi-käkilinden gözel zerefşan çykar,
Zerefşan dahyl imesdir, Nil-ummanym bar meniň.

Deşte saýýat bolup girse, gutarmaz bir maraly,
Bent eýlemiş bir zülpüne kadyr suwhan bu haly,
Bahyllar pälin unudyp, sadaka kylmyş maly,
Bilmenem men, janymdamy ol gözelniň hyýaly,
Gül roýuna günde ýanyp, ança pyganym bar meniň.

Zaryma toba kylypdyr goňşy, gardaş, illerim,
Zemin bilen süýrenipdir deňzi Hazar ýellerim,
Bilbilige intizardyr bag içinde güllerim,
Aýdadyr Magtymguly, asal ermişdir tillerim,
Arş içre mekan tutan ajap destanym bar meniň.

Ýeri : klassiklerimiz, Magtymguly