Berilen Baha    (0 baha)

Näçe gezek okaldy? 356

Halanlaryň Sany 43

Eşit, perim, aşyk boldum,
Men ilki başdan dogrusy.
Birje görmän, maýyl boldum,
Göz bilen gaşdan, dogrusy.

Külli älem şahy sen-sen,
Ýedi pelek mahy sen-sen,
Köňlümniň hoşgähi sen-sen
Sil rowan ýaşdan, dogrusy.

Ýüzüň Züleýhanyň görki,
Aýlanar pelegiň çarhy,
Bildirmez adamyň parhy,
Syn bilen daşdan, dogrusy.

Gyz alynar galyň bilen,
Adam solar zulum bilen,
Nesibedir, ölüm bilen
Dynar teşwüşden, dogrusy.

Diller ýagşy-ýaman saçar,
Her kişiden döwran geçer,
Namart ýigit aýbyn açar,
Syzdyryp dişden, dogrusy.

Gündize Gün, gijä Mahtap,
Derýa lebi – oldur Lebap,
Içer bolsa her kes şerap,
Galarmyş huşdan, dogrusy.

Galmagaldan bela geler,
Ýagşy-ýaman bary biler,
Kimse aglar, kimse güler,
Gün çykar çäşden, dogrusy.

Gaplaň gürlär saý içinde,
Gurçuk ýörer laý içinde,
Garyp bolsa baý içinde,
Agarar saçdan, dogrusy.

Ger, Pyragy, hemra bolsaň,
Naçar galan göwün alsaň,
Ýagşy bilen oýnap-gülseň,
Aýyrmaz huşdan, dogrusy.

Ýeri : klassiklerimiz, Magtymguly