Ýandyrdyň, köýdürdiň, näzli dildarym,

Eý, binurbat, rehm etmezmiň halyma?

Rast kamaty serwi, çeşmi hunhorym,

Helal gaşyn ogşamazmy kemana?

Intizaram görjek, eý peri-peýker,

Husnuň   mähtajydyr mahy-minewwer,

Örüm-örüm saçyň —  owsunjy ajdar,

Hurşyt ýüzüň ogşar genji-nahana.

Saňa aşyk bolan  ýanar, kül bolar,

Zulmuna dözmeýän namyrat galar,

Gözümiň degresi möwç urup dolar,

Gündizler — ýaş bilen, gijeler gana.

Nepes diýer, yşkyň ýandyrdy bizi,

Janymny alypdyr laglynyň sözi,

Teke, Ýomut, ärsary — türkmeniň gyzy —

Barysy gurbandyr bir Durdy hana.