Berilen Baha    (0 baha)

Näçe gezek okaldy? 202

Halanlaryň Sany 20

Adam ogly ýatma, oýan,

Ömrüň ötüp, başyň gider.

Baky berilmez bujahan,

Barça deňiň-duşuň gider.

Garradykça güýç kemerler,

Maza gider, diş köneler,

Gellat gözleriň köneler,

Yşkyň köýüp, huşuň gider.

Ne aglan galar, ne gülen,

Arman bilen geçer gelen,

Heserdeş deň-duşuň bilen,

Gadyrdan syrdaşyň gider.

İskender deý ýerni alsaň,

Lukman bolup, çäre kylsaň,

Eflatun deý baryn bilsen,

Bir gün akyl-huşuň gider.

Ajal tor çeker daşyňa,

Toprak inderer başyňa,

Ýoldaş bolup bu leşiňe,

Otuz bile yaşyň gider.

Nije gezseň anja sürüp,

Bir gün düz bolar sen erip,

Ýanyň bile hemra ýörüp,

Haýry-şer kylmyşyň gider.

Aşyky diýr, bir ölüp,

Ten topraga döner solup.

Jana azaply ot bolup,

Mundan ýaman işiň gider.

Ýeri : klassiklerimiz, Oraz Aşyky